Autoriteti i Konkurrencës ka vendosur një sërë masash dhe detyrimesh të reja për operatorët Vodafone Albania SHA dhe One Albania SHA, pas përfundimit të hetimit të thelluar në tregun me pakicë të shërbimeve celulare.
Sipas njoftimit zyrtar, vendimi i Komisionit të Konkurrencës synon të korrigjojë problematikat e konstatuara gjatë hetimit, duke rritur transparencën, zgjedhjen për konsumatorët dhe aksesin në paketa më të favorshme.
Gjatë hetimit, Autoriteti konstatoi rritje progresive dhe të përafërta të çmimeve nga operatorët, ngjashmëri të lartë mes paketave të ofruara, reduktim të ofertave me çmime më të ulëta, si dhe mungesë dokumentacioni të mjaftueshëm për të justifikuar ndryshimet tarifore.
Në bazë të vendimit të datës 24 korrik 2026, Vodafone Albania dhe One Albania duhet që brenda 90 ditëve të krijojnë paketa të veçanta dhe më të favorshme për pensionistët dhe studentët e moshës 18 deri në 23 vjeç.
Një tjetër detyrim i vendosur është që paketat më ekonomike të jenë të disponueshme jo vetëm përmes aplikacioneve apo kanaleve digjitale, por edhe në të gjitha pikat fizike të shitjes.
Vendimi parashikon gjithashtu që abonentët, pas përfundimit të kontratës, të kenë të drejtën të kalojnë në një paketë më të lirë pa penalitete dhe pa pengesa të pajustifikuara.
Operatorët do të jenë të detyruar të njoftojnë individualisht çdo abonent për çdo ndryshim të çmimit, përmbajtjes ose vlefshmërisë së paketave, të paktën 30 ditë përpara hyrjes në fuqi të ndryshimeve.
Po ashtu, çdo rritje çmimi duhet të mbështetet në analiza të dokumentuara të kostove, të cilat kompanitë do të duhet t’i ruajnë për një periudhë pesëvjeçare.
Autoriteti kërkon gjithashtu që paketat e reja të kenë diferencim real dhe të mos kufizojnë zgjedhjen e konsumatorëve. Kontratat tip do t’i nënshtrohen vlerësimit paraprak të Autoritetit të Konkurrencës për të shmangur klauzolat e padrejta, ndërsa procedurat dhe afatet për bartjen e numrit nga një operator te tjetri duhet të jenë të përcaktuara qartë në kontratat me abonentët.
Autoriteti i Konkurrencës njoftoi se zbatimi i të gjitha detyrimeve do të monitorohet për një periudhë njëvjeçare nga hyrja në fuqi e vendimit. Në rast të moszbatimit të masave, Vodafone Albania SHA dhe One Albania SHA do të përballen me penalitetet e parashikuara nga legjislacioni në fuqi.