TIRANË– Një ngjarje e rëndë ka ndodhur në Itali ku shtetas, babë e bir, 61-vjeçar dhe 22-vjeçar janë munduar të ndalonin një grup “skifterësh” shqiptarë, që sapo kishin hyrë me forcë në shtëpinë e tyre.
Do të kishte qenë grabitja e dytë e kryer brenda pak orësh, por falë këmbënguljes së babait dhe të birit, të paktën njëri nga dy grabitësit u ndalua dhe do të përballet me drejtësinë.
Incidenti ndodhi të shtunën e kaluar, më 18 tetor, në komunën e Arcugnano-s, në provincën e Vicenzës. Një prej të dyshuarve, 36-vjeçar, uu ndalua pasi dy familjarëve italianë u erdhi në ndihmë edhe fqinji i tyre 49-vjeçar.
Dy hajdutët kishin vizituar tashmë shtëpinë ngjitur, por gjatë vjedhjes së dytë, ata u zbuluan nga pronarët. Pasoi një përleshje e dhunshme, me familjarët që u goditën me shqelma dhe grushte, por ata përfundimisht arritën të ndalonin njërin nga sulmuesit. Bashkëpunëtori, megjithatë, arriti të arratisej, informon media italiane.
Karabinierët arrestuan 36-vjeçarin shqiptar, me precedentë kriminalë, i cili u dërgua në burgun e Vicenzës, ndërsa hetimet po vazhdojnë për të identifikuar bashkëpunëtorin e tij./Radar.al