Një grua 53-vjeçare, e cila prej vitesh jeton jashtë Shqipërisë, ka ndarë për emisionin “Me Zemër të Hapur” në News24 historinë e saj të dhimbshme, të mbushur me vuajtje, përjashtim dhe padrejtësi brenda familjes.
Ajo tregon se ka kaluar pjesën më të madhe të jetës në konflikt me vëllanë dhe motrat e saj. Pas vdekjes së prindërve, sipas rrëfimit të saj, është përjashtuar nga menaxhimi i pronës së familjes me arsyetimin se “ishte martuar” dhe, për këtë arsye, nuk kishte më të drejtë mbi tokën e trashëgimisë. Ky përjashtim, tregon ajo mes lotësh, ka pasur një ndikim të rëndë në shëndetin e saj psikologjik.
“Vëllezërit dhe motrat më larguan nga çdo e drejtë. Më thoshin se nuk më takonte gjë, sepse nuk jetoja më aty. Më shanin, më përqeshnin…”, rrëfen ajo.
Por dhimbja më e madhe për të, duket se lidhet me trajtimin që i është bërë nënës së saj.
“Nënën time, për vite me radhë, babai e mbajti të ngujuar në shtëpi. Njerëzit në fshat e quanin të sëmurë mendore, por ajo nuk ishte ashtu. Ajo ishte thjesht e izoluar dhe e keqtrajtuar. E kishte humbur veten nga dhuna dhe nga jeta që bënte. Babai e trajtonte si shërbëtore, nuk kishte kontakt me askënd. Edhe mua më thoshin se isha ‘si ajo’, budallaçkë.”
Gruaja kërkon ndihmë dhe drejtësi, duke i bërë thirrje autoriteteve dhe publikut që të dëgjojnë zërin e saj dhe të mos lejojnë që histori të tilla të përsëriten.