Një 39-vjeçar ka rënë në prangat e Policisë në Lezhë, pasi dyshohet se tregtonte në argjendarinë e tij ora dore të markave luksoze dhe bizhuteri floriri të vjedhura jashtë vendit, të futura në Shqipëri në mënyrë të paligjshme.
Arrestimi u krye në kuadër të operacionit policor të koduar “Final O’clock”, gjatë të cilit u sekuestruan sende me vlerë të përafërt prej 300 mijë eurosh, si edhe një shumë parash që dyshohet se rrjedh nga aktiviteti kriminal.
Sipas Policisë së Lezhës, në pranga u vu shtetasi me iniciale A. M., 39 vjeç, banues në Lezhë. Hetimet e zhvilluara nga Seksioni për Hetimin e Krimeve Ekonomike dhe Financiare, në bashkëpunim me Prokurorinë, ngritën dyshime se ai tregtonte mallra të kontrabanduara, të cilat më herët ishin vjedhur jashtë Shqipërisë.
Gjatë kontrollit në argjendari, policia gjeti dhe sekuestroi 133 ora dore të markave të njohura, të cilat nuk shoqëroheshin me dokumentacion që provonte origjinën e tyre. Po ashtu u bllokuan rreth 3.3 kilogramë bizhuteri floriri, për të cilat mungonin faturat e blerjes.
Në cilësinë e provës materiale u sekuestruan edhe rreth 270 500 lekë dhe 2 700 euro, të dyshuara si të ardhura të përfituara nga kjo veprimtari.
Policia njofton se hetimet vijojnë për të dokumentuar plotësisht aktivitetin e dyshuar kriminal dhe për të identifikuar persona të tjerë që mund të kenë qenë të përfshirë në këtë skemë.