Modelja shqiptare Arbenita Ismajli ka zgjedhur të reagojë në mënyrë të tërthortë ndaj lajmeve për urdhër-arrestin dhe letrën e rreshtimit ndërkombëtar të lëshuar ndaj saj nga Gjykata Themelore e Gjilanit.
Vetëm një ditë pas njoftimit zyrtar nga autoritetet e drejtësisë në Kosovë, ajo publikoi në InstaStory një fotografi ku shfaqet duke pushuar pranë detit, e veshur me bikini me vija të kuqe e të bardha, shtrirë në një shtrat plazhi me një hamburger dhe patate të skuqura përpara. Në mbishkrimin e fotos, Ismajli shkruan me ironi: “Me when I get the motivation to post again ” (“Unë kur më vjen motivimi për të postuar përsëri”), shoqëruar me një emoji duke qeshur. Ky postim u interpretua nga shumë ndjekës si një reagim sfidues ndaj zhvillimeve të fundit ligjore.
Sipas Gjykatës Themelore të Gjilanit, më 14 gusht 2025 është lëshuar urdhër-arrest dhe letër-rreshtim ndërkombëtar ndaj Ismajlit, pas kërkesës së Prokurorisë Themelore. Ajo akuzohet për “Marrje apo mbajtje të kundërligjshme të fëmijës” dhe “Mospërfillje të gjykatës”. Hetimet pretendojnë se, që nga shtatori 2024, ajo ka larguar vajzën nga Kosova dhe ka udhëtuar me të në disa vende të Evropës dhe Lindjes së Afërt, duke ia pamundësuar babait të saj – reperit Feron Shabani – të zbatojë vendimin gjyqësor që i lejonte ta takonte dy herë në muaj.
Nga ana tjetër, Prokuroria ka ngritur aktakuzë edhe ndaj Feron Shabanit për tri vepra penale – dhunë në familje, ngacmim seksual dhe kanosje – të cilat dyshohet se janë kryer ndaj Arbenita Ismajlit gjatë periudhës qershor–tetor 2024.