Përfaqësuesja e Anglisë po përballet me shqetësime të reja në repartin e mbrojtjes, pasi Jarell Quansah është në dyshim serioz për ndeshjen e 1/16-ave ndaj DR Kongos.
Mbrojtësi ka pësuar një dëmtim në kyçin e këmbës gjatë sfidës ndaj Panamasë dhe, ndonëse gjendja e tij nuk është aq e rëndë sa u dyshua fillimisht, ai nuk ka gjasa të rikuperohet në kohë për takimin e së mërkurës. Quansah nuk është bashkuar me stërvitjet e grupit dhe po ndjek një program individual rehabilitimi.
Probleme ka edhe për Reece James, i cili gjithashtu mungoi në seancën stërvitore dhe po vijon trajtimin veçmas, duke e bërë të pasigurt pjesëmarrjen e tij në fazat e ardhshme të turneut, përfshirë edhe 1/8-at në Mexico City.
Trajneri Thomas Tuchel nuk e ka përjashtuar plotësisht Quansah nga ndeshja ndaj DR Kongos, por gjasat që ai të jetë i gatshëm mbeten të ulëta.
Në këto kushte, një nga opsionet kryesore për krahun e djathtë të mbrojtjes mbetet Djed Spence, i cili ishte përfshirë si surprizë në listën me 26 lojtarë. Ai ka zëvendësuar më herët Quansah në ndeshjen ndaj Ganës dhe ka luajtur edhe në krahun e majtë gjatë fazës së grupeve.
Trajneri anglez po shqyrton edhe alternativa të tjera, përfshirë vendosjen e Ezri Konsa ose John Stones në krahun e djathtë të mbrojtjes, si dhe një zgjidhje më të pazakontë me Jordan Henderson në atë rol.
Megjithatë, Djed Spence shihet si opsioni më i mundshëm për të nisur nga minuta e parë ndaj DR Kongos, duke qenë se ka pasur më shumë minuta në dispozicion gjatë turneut.
Ndërkohë, Reece James do të mungojë në këtë ndeshje, duke vijuar problemet e tij të vazhdueshme me dëmtimet.