Brazili do të përballet mbrëmjen e kësaj të diele me Norvegjinë në një ndeshje vendimtare për një vend në çerekfinalet e Botërorit 2026. Në prag të sfidës, trajneri Carlo Ancelotti bëri një analizë të ecurisë së “Seleçaos”, duke vlerësuar me nota paraqitjet e skuadrës në katër ndeshjet e para të turneut.
I pyetur nga gazetarët, tekniku italian u ndal te performancat e Brazilit, duke dhënë këto vlerësime: 5 për ndeshjen me Marokun, 6.5 ndaj Haitit, 7 kundër Skocisë dhe 7.5 për përballjen me Japoninë.
“Për ndeshjen me Japoninë shtova edhe gjysmë note për rezultatin dhe emocionet e golit të kualifikimit në minutën e 94-t”, tha Ancelotti me humor, duke shkaktuar të qeshura në sallën e konferencës për shtyp.
Trajneri theksoi se skuadra ka bërë hapa përpara, por ka ende vend për përmirësim.
“Jemi përmirësuar në menaxhimin e lojës dhe qarkullimin e topit, por mund të bëjmë edhe më mirë, veçanërisht në fazën sulmuese”, u shpreh ai.
Ancelotti, i cili mori drejtimin e Brazilit 13 muaj më parë, do të përballet tani me një nga testet më të rëndësishme të aventurës së tij në pankinën e “Seleçaos”, përballë Norvegjisë së drejtuar nga Ståle Solbakken.
Tekniku italian vlerësoi gjithashtu nivelin e lartë të Botërorit, duke veçuar paraqitjen e Kepit të Gjelbër ndaj Argjentinës.
“Ky është një Botëror me shumë cilësi. Askush nuk e priste që Kepi i Gjelbër ta vinte Argjentinën në kaq shumë vështirësi. Meritojnë komplimente lojtarët dhe trajneri i tyre. Futbolli modern ka ndryshuar, sot çdo kundërshtar është i përgatitur”, përfundoi Ancelotti.