Zëvendëskryeministrja Albana Koçiu ka reaguar pas aksidentit të rëndë të ndodhur mesditën e së martës në autostradën Tiranë–Durrës, ku humbi jetën drejtuesi i një autobusi të linjës Berat–Tiranë dhe mbetën të plagosur 12 pasagjerë.
Përmes një mesazhi në rrjetet sociale, Koçiu shprehu ngushëllimet për familjen e viktimës, ndërsa uroi shërim të shpejtë për të gjithë të lënduarit.
“Tronditës lajmi për aksidentin tragjik në autostradën Tiranë–Durrës. Ngushëllimet më të sinqerta familjes së viktimës për këtë humbje të madhe. Të lënduarve u uroj shërim të shpejtë, me shpresën që ta kalojnë sa më parë këtë sfidë të vështirë dhe të rikthehen shëndoshë e mirë pranë më të dashurve të tyre”, shkruan Koçiu.
Sipas bilancit të përditësuar nga Policia e Shtetit, aksidenti i rëndë i regjistruar në segmentin Qafë Kashar–Casa Italia i mori jetën drejtuesit të autobusit, ndërsa 12 pasagjerë mbetën të plagosur, shtatë prej të cilëve ndodhen në gjendje të rëndë.