Testet e ADN-së kanë konfirmuar zyrtarisht se trupi i pajetë i gjetur pak ditë më parë në zonën e Cërrunjës i përket 34-vjeçarit Eglant Koçi, i cili ishte shpallur i zhdukur që prej 4 qershorit.
Megjithëse grupi hetimor kishte dyshime të forta se bëhej fjalë për Koçin, bazuar në karakteristika identifikuese si shenja e një ndërhyrjeje kirurgjikale, numri i këmbës dhe veshjet që ai mbante ditën kur u pa për herë të fundit, konfirmimi përfundimtar erdhi pas analizave të ADN-së.
Trupi u gjet në gjendje të avancuar dekompozimi, pas më shumë se dy javësh kërkime intensive nga strukturat e Policisë së Shtetit, të mbështetura edhe nga forcat e sigurisë së Kosovës dhe mjete të specializuara, përfshirë dronë.
Pas identifikimit zyrtar, familjarët pritet të kryejnë procedurat për tërheqjen e trupit nga morgu i Tiranës.
Ndërkohë, hetimet vijojnë për zbardhjen e plotë të ngjarjes. Autoritetet dyshojnë se 34-vjeçari mund të jetë vrarë, ndërsa si person i dyshuar për ngjarjen konsiderohet Armando Shakaj, i cili vijon të jetë në kërkim.
Hetuesit po punojnë për dokumentimin e plotë të rrethanave të ngjarjes dhe lokalizimin e personit të shpallur në kërkim.