Lionel Messi vazhdon të shkruajë historinë e futbollit botëror, ndërsa pas arritjes së tij më të fundit ka marrë një dedikim të veçantë nga bashkëshortja, Antonela Roccuzzo.
Kapiteni argjentinas ishte protagonisti kryesor në fitoren e skuadrës së tij ndaj Austrisë, duke realizuar dy gola dhe duke vendosur një rekord të ri në historinë e turneut. Me 18 gola të shënuar, Messi është bërë golashënuesi më i mirë i të gjitha kohërave në këtë kompeticion.
Megjithëse humbi një penallti gjatë ndeshjes, ylli argjentinas reagoi në mënyrën më të mirë të mundshme, duke gjetur rrugën e rrjetës në minutën e 38-të dhe në kohën shtesë, për të vulosur suksesin e ekipit të tij.
Nga tribunat e stadiumit në Arlington të Teksasit, Antonela Roccuzzo e ndoqi ndeshjen së bashku me tre djemtë e çiftit, të cilët kishin veshur fanellat e babait të tyre.
Pas përfundimit të sfidës, ajo ndau në rrjetet sociale një mesazh emocionues për Messin:
“Çfarë privilegji të të shoh të bësh histori sërish e sërish.”
Postimi u shpërnda me shpejtësi nga fansat në mbarë botën, duke mbledhur mijëra pëlqime dhe komente. Nuk mungoi as reagimi i vetë Messit, i cili iu përgjigj bashkëshortes me një koment të shkurtër, por plot dashuri:
“Të dua.”
Momenti u kthye menjëherë në një nga më të komentuarit në rrjetet sociale, duke kombinuar suksesin sportiv të argjentinasit me mbështetjen e vazhdueshme të familjes së tij.