Mendohet se janë gati dy miliardë njerëz në botë që vuajnë nga infeksionet mykotike dhe rreth dy milionë njerëz humbin jetën për shkak të tyre, duke zënë vendin e pestë në vdekjet e përgjithshme në botë.
Nutricionisti nga Suedia Altin Joka shpjegon:
”infeksionet mykotike, të njohura dhe si mykozë, janë një gjendje që vjen nga kërpudhat që hyjnë dhe zhvillohen në trupin tonë, kryesisht kur niveli i sistemit imunitar është më i ulët se zakonisht. Janë rreth 13 milion njerëz në ditë të ekspozuar ndaj një infeksioni mykotik, ndërsa sipas studimeve, infeksionet mykotike janë bërë shumë rezistente ndaj ilaçeve. Këto infeksione kur hyjnë në trupa, prodhojnë toksina që dëmtojnë qelizat, indet dhe organet tona”, shtoi ai në emisionin Rreze Dielli.
Së fundmi sipas tij është shfaqur një kërpudhë shumë rezistente si ‘Kandida auris’ që ka krijuar shumë probleme dhe është zbuluar në Japoni në vitin 2009. Kandida e zakonshme është gjithashtu e rrezikshme në trup, pasi gjendet në zorrë, rrugë gjenitale, apo membranat e mukozës së mushkërisë.
”Nëse nuk kontrollohet, mund të dëmtohet ekuilibri i pehashit të trupit tonë, bakteret e mira prishen, sistemi imunitar bie dhe krijon inflamacion” tha Altini, duke shtuar se përdorimi i antibiotikëve pa kriter do të ulë sistemin imunitar dhe krijon çrregullime në organizëm. Personat që përdorin kontraceptiv apo kortizonik, kanë më tepër probleme, sikurse ata që përdorin tubat e astmës, apo personat me tumore që kanë një ndërlikim të kandidës, pa harruar personat që kanë sëmundje autoimune.
Cilët janë shenjat apo simptomat që dallojmë kur kemi kandida?
Së pari ne flemë shumë dhe në kohë të gjatë, pasi ndjejmë lodhje. Së dyti dhimbja e kyçeve pa asnjë arsye. Së treti, dhimbja apo tharja e fytit, çrregullime të shpeshta të humorit, apo sulme paniku si dhe rënie e flokëve. Era e keqe e gojës dhe gjuha e bardhë janë një tjetër shenjë. Dëshira e shpeshtë për sheqer, infeksionet e sinusit janë një tjetër element. Problemet me zorrët, kur kemi gromsira, diare dhe kapsllëk, gazra, etj. Mjegulla e trurit shpesh neglizhohet si një nga simptomat e kandidës, sikurse kujtesa e dobët. Element tjetër është dhe çekuilibri hormonal.