Në këtë artikull Radar.al risjell dhe një herë pjesë të dosjes hetimore të SPAK lidhur me ish gjyqtaren Pajtime Fetahu, e cila këtë 25 nëntor u vu në pranga.
Hetimet e SPAK për grupin kriminal Çopja zbuluan lidhjet e bandës në sistemin e drejtësisë. Ish-gjyqtarja e Elbasanit Pajtime Fetahu akuzohet se mori ryshfet 11 mijë euro dhe një monedhë floriri. Kërkoi nga grupi kriminal t’i blihej dhe një celular.
Krahas penetrimit në radhët e policisë, grupi kriminal Çopja kishin të besuarit e tyre edhe në radhët e sistemit të drejtësisë.
Bëhet fjalë për ish-gjyqtaren e Elbasanit Pajtime Fetahu e cila akuzohet për korrupsion dhe aktualisht ndodhet në “Arrest shtëpie”.
Sipas komunikimeve të zbardhura në aplikacionin SKY ECC, gjyqtarja, ka mbajtur kontakte me anëtarët e grupit Çopja përmes shtetasit Arzen Mama, mik i saj.
Në biseda anëtarët e grupit Çopja i referohen gjyqtares me nofkën “komshija”.
Këto njohje, Arzen Mama i ka shfrytëzuar, për të marrë prej ish gjyqtares Pajtime Fetahu, të dhëna e informacione lidhur me dosjet që ajo ka patur në hetim. Si rezultat të hetuarit Qosja dhe Mama, i kanë dhënë shtetases Pajtime Fetahu, përfitime të parregullta.
Krahas informacionit që i ka përcjellë grupit Çopja për masën “Arrest me burg” për kundërshtarin e tyre Erion Alibej, më 18 shtator 2020 para se të ekzekutohej vendimi, gjyqtares i është kërkuar nga Mikael Qosja nëpërmjet shtetasit Arzen Mama që ajo të ndikojë dhe të ndihmojë në lehtësimin e pozitës proceduriale të anëtarëve të grupit Çopja konkretisht shtetasve Ervis Daka dhe Altin Kamami.
Sipas SPAK është evidentuar në të paktën dy raste gjyqtarja Fetahu ka marrë nga shtetasi Mikael Kamami (Qosja) nëpërmjet shtetasit Arzen Mama shuma monetare si përfitim i padrejtë, 10.000 Euro, 1.000 Euro dhe një monedhe floriri si dhuratë për mbesën e porsalindur.
Gjithashtu Euronews Albania mëson sipas dosjes dhe akuzës së ngritur nga SPAK se shtetasja Pajtime Fetahu i ka kërkuar shtetasit Arzen Mama që t’i blejë një aparat telefonik celular.