Pas ngjarjes tragjike ku një 3-vjeçar humbi jetën për shkak të ndërhyrjes dentare mësohet se Italia e ktheu letërporosinë e Prokurorisë së Tiranës për kryerjen e ekspertizën mjekoligjore.
Letërporosia bëhet me dije se është kthyer për mungesë dokumentacioni, pasi organi i akuzës mësohet se ka dërguar vetëm letrat dhe jo mostrat e plota.
Familjarët e vogëlushit kanë kundërshtuar që ekspertiza mjekoligjore të ribëhet në Itali.
Sipas, ekspertizës mjekoligjore që u bë nga IML rezultoi se shkak për vdekjen fatale të 3 vjeçarit ishte anestezia gjatë ndërhyrjes kirurgjikale në klinikën dentare të mjekut Roland Xhaxho.
Por prokuroria e Tiranës kërkoi të bëhej ekspertiza mjekoligjore në Itali, pasi sipas organit të akuzës akti i parë i ekspertizës ishte i paplotë, konkluzioni ishte i pasaktë dhe mungonin ekspertët e fushës për të dhënë përgjigje pyetjeve të lindura në lidhje me ngjarjen.
Gjithahstu zbulohet se prokuroria ka marrë në pyetje vetëm një mjek në QSUT, ndërsa bluzat e tjera të bardha nuk janë marrë në pyetje kur 3-vjeçari ishte i shtruar te pediatria, pasi kishte bërë ndërhyrje në dhëmbë te klinika e Roland Xhaxhos.
Mësohet se kur Briani ishte i shtruar në QSUT kanë asistuar rreth 6 mjekë. Po ashtu, prokuroria ka sekuestruar kartelën te QSUT dhe nuk ka lënë asnjë kopje për familjarët.
Familjarët e 3-vjeçarit kanë kërkuar vazhdimisht informacion nga prokuroria lidhur me hetimet, por nuk ka marrë asnjë përgjigje.
Përgjigja e kthyer është “Ju si trashëgimtarë të viktimës nuk keni të drejtë të informoheni gjatë hetimit, kur të mbarojnë hetimet do u pajis me dosjen”.
3-vjeçari Brian Spahiu ndërroi jetë ne reanimacionin e Pediatrisë më datë 1 tetor 2023, tre ditë pas një mjekimi që kreu në 14 dhëmbë në klinikë dentare të mjekut Roland Xhaxho.