Gjykata Kushtetuese ka zbardhur vendimin me të cilin rikthen për rishqyrtim në Gjykatën e Lartë çështjen që lidhet me masën e sigurisë ndaj kryebashkiakut të Tiranës, Erion Veliaj.
Sipas arsyetimit të Gjykatës Kushtetuese, Gjykata e Lartë nuk ka ushtruar një kontroll kushtetues efektiv mbi ligjshmërinë dhe proporcionalitetin e masës së sigurisë, duke mos analizuar ndikimin e saj në raport me funksionin publik që ushtron Veliaj.
Në vendim theksohet gjithashtu se nuk janë vlerësuar në mënyrë konkrete alternativat ndaj paraburgimit, ndërsa mungon edhe një analizë kushtetuese mbi pasojat që kjo masë ka si për të drejtën e të zgjedhurit për të ushtruar mandatin e fituar me votën e qytetarëve, ashtu edhe për të drejtën e qytetarëve për t’u përfaqësuar nga personi që kanë zgjedhur.
Për rrjedhojë, Gjykata e Lartë do të duhet ta shqyrtojë sërish çështjen, duke respektuar standardet kushtetuese të përcaktuara nga Gjykata Kushtetuese.
Erion Veliaj është marrë i pandehur nga Prokuroria e Posaçme Kundër Korrupsionit dhe Krimit të Organizuar (SPAK), nën akuzat për korrupsion, pastrim parash dhe mosdeklarim të pasurisë.
Kryebashkiaku i Tiranës ndodhet në paraburgim në institucionin e vuajtjes së dënimit në Durrës që prej 10 shkurtit 2025, pas arrestimit të tij në kuadër të hetimeve të SPAK.