Qeveria ka shpallur Qendrën Historike të fshatit Dhërmi si pasuri kulturore të paluajtshme, duke përcaktuar njëkohësisht edhe zonën e saj të mbrojtur. Vendimi u miratua në mbledhjen e kësaj të premteje, me propozim të Ministrisë së Turizmit, Kulturës dhe Sportit.
Vendimi bazohet në ligjin “Për trashëgiminë kulturore dhe muzetë” dhe synon ruajtjen, mbrojtjen dhe promovimin e vlerave historike, arkitektonike dhe kulturore të një prej qendrave më të rëndësishme historike në jug të vendit.
Krahas shpalljes së statusit të ri, Këshilli i Ministrave miratoi edhe planin për ruajtjen, mbrojtjen dhe administrimin e Qendrës Historike të Dhërmiut dhe zonës përreth, i cili do të shërbejë si dokumenti bazë për menaxhimin dhe zhvillimin e kësaj pasurie kulturore.
Sipas vendimit, hartat që përcaktojnë kufijtë e zonës së mbrojtur do të publikohen në Gjeoportalin Kombëtar, ndërsa Agjencia Shtetërore e Kadastrës do të kryejë regjistrimin përkatës.
Për zbatimin e këtij vendimi janë ngarkuar Ministria e Turizmit, Kulturës dhe Sportit, Ministria e Infrastrukturës dhe Energjisë, si dhe Bashkia Himarë.