Një 18-vjeçar është shoqëruar nga policia pasi dyshohet se ka qëlluar me armë zjarri në drejtim të një servisi celularësh në zonën e Babrrusë, mbrëmjen e së premtes.
Sipas njoftimit zyrtar të Policisë, ngjarja ka ndodhur rreth orës 20:25, kur autori i dyshuar ka qëlluar me armë në drejtim të subjektit, i cili në atë moment ishte i mbyllur, dhe më pas është larguar nga vendi i ngjarjes.
Menjëherë pas marrjes së njoftimit, shërbimet e Policisë kanë mbërritur në vendngjarje dhe kanë nisur ndjekjen e autorit të dyshuar. Rreth 3 kilometra larg vendit të ngjarjes, uniformat blu bënë të mundur kapjen dhe shoqërimin e shtetasit me inicialet R. M., rreth 18 vjeç, për kryerjen e veprimeve të mëtejshme procedurale.
Nga të dhënat paraprake nuk raportohen persona të lënduar si pasojë e të shtënave.
Grupi hetimor vijon punën për zbardhjen e plotë të rrethanave të ngjarjes, identifikimin e motiveve dhe dokumentimin ligjor të rastit.