Komisioni Evropian ka urdhëruar shërbimin e mesazheve WhatsApp, në pronësi të “Meta”-s, që të rikthejë pa pagesë aksesin për kompanitë rivale të inteligjencës artificiale, deri në përfundimin e hetimit antitrust që po zhvillohet ndaj gjigantit teknologjik amerikan.
Sipas nënkryetares së Komisionit Evropian për konkurrencën, Teresa Ribera, masa synon të parandalojë dëmtimin e konkurrencës në një treg që po zhvillohet me shpejtësi.
“Në tregjet që ndryshojnë me shpejtësi, konkurrenca mund të dëmtohet shumë përpara se të merret një vendim përfundimtar”, deklaroi ajo, duke theksuar rëndësinë e mbrojtjes së inovacionit dhe aksesit të barabartë në tregun e inteligjencës artificiale.
Sipas vendimit, “Meta” duhet të zbatojë urdhrin brenda pesë ditëve, duke siguruar që kompanitë e AI-së të kenë akses të lirë në platformën WhatsApp për qëllime konkurruese dhe zhvillimi teknologjik.
Komisioni Evropian po heton “Meta”-n për shkelje të mundshme të rregullave të konkurrencës, pasi kompania kishte njoftuar më herët kufizimin e aksesit për ofruesit rivalë të inteligjencës artificiale në WhatsApp. Më pas, sipas autoriteteve, ky akses ishte planifikuar të jepej vetëm kundrejt pagesës, çka u konsiderua si masë me efekt kufizues në treg.
Sipas Komisionit, vendosja e tarifave për aksesin mund të ketë të njëjtin efekt si ndalimi i tij, duke rrezikuar konkurrencën dhe hyrjen e aktorëve të rinj në tregun e asistentëve të inteligjencës artificiale.
Autoritetet evropiane theksojnë se ndërhyrja është e nevojshme për të mbrojtur një sektor në zhvillim të shpejtë, ku kompanitë e vogla dhe startup-et duhet të kenë mundësi të barabarta për të konkurruar me gjigantët teknologjikë.
Në rast se hetimi përfundon me konstatimin e shkeljeve të rregullave të BE-së për konkurrencën, “Meta” mund të përballet me sanksione financiare të konsiderueshme.
Ndërkohë, kompania vijon të jetë nën vëzhgim edhe për çështje të tjera në Bashkimin Evropian, përfshirë transparencën e të dhënave, menaxhimin e përmbajtjeve të paligjshme dhe mbrojtjen e të miturve në platformat e saj.