Rreth 200 pasagjerë që pritej të udhëtonin pasditen e sotme nga Treviso drejt Tiranës me kompaninë ajrore Ryanair, janë përballur me vonesa të gjata dhe mungesë informacioni, duke mbetur të bllokuar për orë të tëra në pritje të nisjes së fluturimit.
Sipas dëshmive të udhëtarëve, fluturimi fillimisht ishte planifikuar të nisej në orën 17:40, por më pas pasagjerët janë lëvizur mes aeroporteve të Trevisos dhe Venecias pa marrë sqarime të qarta për shkaqet e vonesës.
Një prej pasagjerëve, i cili udhëtonte me familjen drejt Shqipërisë, ka deklaruar se situata ka shkaktuar pasiguri dhe shqetësim, veçanërisht për familjet me fëmijë dhe persona të moshuar.
“Ishim mbi 200 pasagjerë dhe na kanë sorollatur nga Treviso në Venecia. Nuk kemi marrë informacion të qartë dhe ende nuk dimë orarin real të nisjes”, është shprehur ai.
Sipas njoftimeve të kompanisë në aplikacion, fluturimi FR1134 nga Venecia (Treviso) drejt Tiranës është shtyrë fillimisht për shkak të devijimit të një fluturimi të mëparshëm, ndërsa ora e nisjes është ndryshuar disa herë, duke u zhvendosur fillimisht në 19:00 dhe më pas duke lënë të hapur mundësinë e nisjes rreth orës 01:00 të mëngjesit.
Megjithatë, pasagjerët pretendojnë se komunikimi nga ana e stafit të kompanisë ka qenë i kufizuar, ndërsa mungesa e informacionit të drejtpërdrejtë ka shtuar konfuzionin dhe pakënaqësinë mes udhëtarëve.
Udhëtarët kërkojnë më shumë transparencë dhe koordinim nga kompania ajrore, ndërsa presin që fluturimi të realizohet pas orëve të gjata pritjeje dhe pasigurie.