Talay Riley, kompozitori dhe tekstshkruesi britanik i njohur për bashkëpunimet me disa prej emrave më të mëdhenj të muzikës ndërkombëtare, ka ndërruar jetë në rrethana tragjike pas një sulmi me thikë në lindje të Londrës.
Artisti, emri i vërtetë i të cilit ishte Mark Orabiyi, u gjet i plagosur rëndë në një pronë në zonën e Silvertown, pasi policia u njoftua për ngjarjen rreth orës 09:00 të mëngjesit. Ai kishte marrë plagë të shumta nga goditjet me thikë dhe, megjithëse u transportua me urgjencë në spital, nuk mundi t’u mbijetonte plagëve.
Sipas autoriteteve britanike, në vendngjarje u gjet edhe një burrë tjetër në të njëzetat, i cili kishte pësuar lëndime nga thika. Ai ndodhet nën kujdesin e mjekëve dhe gjendja e tij nuk paraqitet kritike.
Policia Metropolitane ka nisur hetimet për zbardhjen e plotë të ngjarjes. Deri tani janë arrestuar tre persona nën dyshimin për përfshirje në vrasje. Një 27-vjeçar është liruar me kusht në pritje të hetimeve të mëtejshme, ndërsa një burrë 24-vjeçar dhe një grua 25-vjeçare janë liruar pa akuza.
Talay Riley ishte një figurë e respektuar në industrinë muzikore. Ai bashkëshkroi këngën “Last Dance” të Dua Lipa dhe kontribuoi në projekte muzikore të artistëve si Chris Brown, Nick Jonas, Jessie J, Ellie Goulding, David Guetta, Khalid dhe Zendaya.
Ai njihej gjithashtu si bashkautor i hitit “Young, Dumb & Broke” të Khalid dhe “Who Do You Love” të grupit The Chainsmokers.
Lajmi për vdekjen e tij ka shkaktuar reagime të shumta në botën e muzikës. Artistë dhe bashkëpunëtorë të tij kanë shprehur ngushëllimet përmes rrjeteve sociale, duke e kujtuar si një talent të jashtëzakonshëm dhe një njeri me ndikim të madh në industrinë muzikore.
Familja e tij e përshkroi Riley-n si një njeri që solli dashuri, gëzim dhe frymëzim te të gjithë ata që e njohën, ndërsa vëllai i tij, këngëtari Scribz Riley, publikoi një mesazh prekës ku rrëfeu dhimbjen për humbjen e papritur të vëllait.
Hetimet për ngjarjen vijojnë, ndërsa policia britanike ka bërë thirrje për bashkëpunim nga çdo person që mund të ketë informacion ose materiale filmike që mund të ndihmojnë në zbardhjen e plotë të rastit.