Strukturat e Doganës së Durrësit, në bashkëpunim me Policinë e Shtetit, kanë zhvilluar kontrolle të imtësishme në Portin e Durrësit, ku kanë zbuluar dhe sekuestruar një sasi lënde narkotike të dyshuar si kokainë, katër gurë të çmuar të dyshuar si diamante, si dhe një pajisje elektronike për zbulimin e metaleve të çmuara.
Sipas autoriteteve, gjatë kontrollit të një automjeti që kishte mbërritur me tragetin e linjës Ankona–Durrës, u gjet një valixhe ku ndodhej aparatura detektuese së bashku me aksesorët përkatës.
Në një rast tjetër, gjatë kontrollit fizik të një shtetasi që udhëtonte me një automjet të ardhur nga Italia, u zbuluan katër paketime transparente që përmbanin gurë të ngjashëm me diamantet.
Ndërkohë, në një automjet tjetër, efektivët gjetën një sasi të dyshuar kokaine të fshehur brenda një veshjeje të vendosur në kabinën e drejtuesit të mjetit.
Të gjitha materialet e sekuestruara janë vënë në dispozicion të strukturave kompetente, të cilat kanë nisur procedurat dhe hetimet për zbardhjen e plotë të rrethanave të këtyre rasteve.