Prokuroria e Korçës ka zbardhur detaje të reja nga hetimet për ngjarjen e rëndë të ndodhur në Maliq, ku humbi jetën efektivi i forcave “Shqiponja”, Enea Mekolli, ndërsa mbeti i plagosur kolegu i tij Edison Adri.
Sipas njoftimit zyrtar, Gjykata ka lënë në fuqi masën e sigurisë “arrest në burg” për të dyshuarin Violant Braçellari, i cili akuzohet për disa vepra të rënda penale, përfshirë “vrasjen e punonjësve të Policisë së Shtetit”, “vrasje e mbetur në tentativë”, si dhe “mbajtje pa leje dhe prodhim i armëve dhe municionit”.
Sipas Prokurorisë, hetimet lidhen me një operacion të zhvilluar më 4 qershor në zonën e Malit të Bodesë, me qëllim kapjen e Braçellarit, i cili rezultonte i dënuar më parë dhe i shpallur në kërkim prej vitesh.
Në dokumentet hetimore thuhet se operacioni është mbështetur edhe në kallëzimin e një 32-vjeçari, A. K., i cili kishte punuar si çoban në stanin e Braçellarit dhe kishte denoncuar dhunë dhe kërcënime me armë.
Sipas hetimeve, në orët e mëngjesit të 4 qershorit forcat e policisë janë afruar në zonën ku ndodheshin stallat e të dyshuarit, kur janë përballur me të shtëna armësh. Si pasojë e zjarrit, efektivi Enea Mekolli ka humbur jetën në vend, ndërsa Edison Adri është plagosur rëndë.
Prokuroria thotë se i dyshuari ka vazhduar të qëllojë edhe ndaj efektivëve të identifikuar qartë me uniforma dhe pajisje mbrojtëse, ndërsa më pas ka tentuar të largohet nga zona, por është neutralizuar dhe arrestuar pas shkëmbimit të zjarrit.
Nga këqyrja paraprake, Mekolli ka marrë plagë fatale në kraharor, ndërsa kolegu i tij është dëmtuar në kokë. Hetuesit theksojnë se zjarri ka vijuar edhe në momentet kur po tentohej dhënia e ndihmës së parë.
Prokuroria vlerëson se i dyshuari paraqet rrezikshmëri të lartë shoqërore, duke theksuar edhe historikun e tij penal dhe faktin se kishte arritur t’i shmangej drejtësisë për vite me radhë.
Ndërkohë, hetimet nuk kufizohen vetëm te autori i dyshuar. Prokuroria po verifikon gjithashtu nëse gjatë planifikimit dhe ekzekutimit të operacionit janë konsumuar elementë të “shpërdorimit të detyrës” nga struktura drejtuese e Policisë së Shtetit, duke analizuar gjithë zinxhirin e veprimeve paraprake të operacionit.