Brad Arnold, këngëtari kryesor i grupit të njohur amerikan rock 3 Doors Down dhe i nominuar për çmimin Grammy, ka ndërruar jetë në moshën 47-vjeçare. Lajmi vjen disa muaj pas njoftimit të tij publik se ishte diagnostikuar me kancer të veshkave në fazën e katërt.
Grupi 3 Doors Down konfirmoi lajmin përmes një deklarate, duke njoftuar se Arnold “u nda nga jeta i rrethuar nga njerëzit e tij të dashur, në gjumë, pas një beteje të guximshme me kancerin”.
3 Doors Down u formua në vitin 1995 në Misisipi dhe arriti famë ndërkombëtare katër vite më vonë me hitin “Kryptonite”, këngë që Arnold e kishte shkruar që në moshën 15-vjeçare. Albumi debutues i grupit, The Better Life, shiti mbi 6 milionë kopje në mbarë botën.
Grupi ka marrë edhe një nominim tjetër për Grammy në vitin 2003 për këngën “When I’m Gone” dhe është bërë një nga emrat më të njohur të rock-ut alternativ në fillim të viteve 2000. Në total, 3 Doors Down publikoi gjashtë albume, i fundit Us and the Night në vitin 2016.