Linjat e transportit interurban në Vlorë kanë zhvilluar këtë të hënë një protestë paqësore, duke pezulluar përkohësisht aktivitetin e tyre. Drejtuesit e autobusëve që operojnë në linjat drejt Tiranës, Beratit, Elbasanit, Sarandës dhe qyteteve të tjera kanë ndalur qarkullimin në shenjë proteste.
Ata kërkojnë ndërprerjen e konkurrencës së padrejtë nga taksitë dhe furgonët e palicencuar, të cilët, sipas tyre, ushtrojnë aktivitet në mënyrë të paligjshme. Një tjetër problematikë e theksuar është mungesa e një terminali të mirëfilltë për transportin interurban.
Sipas protestuesve, Vlora është i vetmi qytet i madh në vend që ende nuk disponon një terminal funksional, duke sjellë kaos, pasiguri dhe kushte të papërshtatshme si për drejtuesit e mjeteve, ashtu edhe për pasagjerët.
Drejtuesit e autobusëve paralajmërojnë se pezullimi i aktivitetit do të vijojë, duke ndikuar në lëvizjen e qytetarëve, deri në gjetjen e një zgjidhjeje konkrete. Ata kërkojnë zhvillimin e një takimi urgjent me përfaqësuesit e pushtetit vendor dhe institucionet përgjegjëse për të adresuar shqetësimet e ngritura.