Prurjet e lumit Vjosa po rriten me shpejtësi, duke rrezikuar përmbytjen e disa fshatrave përgjatë rrjedhës së tij në bashkinë Fier.
Kreu i bashkisë Fier, Armando Subashi, ka deklaruar për mediat se niveli i lumit në Memaliaj është aktualisht 6 metra. Ai paralajmëroi se nga eksperienca e viteve të mëparshme, kur niveli i lumit arrin 6.5 metra, rreziku për përmbytje bëhet i konsiderueshëm. Subashi theksoi se zonat e rrezikuara po monitorohen vazhdimisht.
Si masë paraprake, banorëve u është bërë apel të fillojnë evakuimin e bagëtive në stane të ndërtuara pranë lumit. Emergjencat pranë bashkisë Fier janë pozicionuar në terren, sidomos pranë Urës së Mifolit, për të ndërhyrë në rast të daljes nga shtrati të lumit.
Ndërkohë, hidrovorët po punojnë me kapacitet të plotë, dhe nuk janë raportuar probleme me furnizimin me energji elektrike.