Policia ka arritur të identifikojë autorin e vendosjes së lëndës shpërthyese në garazhin e shtetasit Ervis Kosova, falë pamjeve të sigurisë të mbledhura nga kamerat e zonës përreth. Ngjarja, e ndodhur më 24 korrik në rrugën “Peti” në Tiranë, ka qenë objekt i një hetimi intensiv nga grupi hetimor, i cili ka mundur të rindërtojë itinerarin e plotë të autorit pas vendosjes së tritolit.
Sipas burimeve zyrtare, pas aktit kriminal, autori është futur në pyllin pranë Liqenit të Thatë, ku ka qëndruar për rreth 30 minuta, duke tentuar të shmangë ndjekjen dhe të humbasë gjurmët. Më pas, ai ka dalë në një rrugicë të afërt dhe është larguar nga zona.
Hetimet zbuluan gjithashtu automjetin e përdorur nga autori Klodian Steli, i cili ishte marrë me qira në Fushë-Krujë. Identifikimi i mjetit dhe gjurmimi përmes kamerave të tjera të sigurisë ka çuar në evidentimin e personit të dyshuar, për të cilin ekziston dyshimi se është larguar nga territori i Shqipërisë po atë ditë që ndodhi shpërthimi.
Policia po vijon hetimet për lokalizimin dhe arrestimin e autorit, ndërsa nuk përjashtohet mundësia që në këtë ngjarje të jenë përfshirë edhe persona të tjerë si bashkëpunëtorë. Autoritetet kanë konfirmuar se ndjekja penale është në vijim dhe se materialet janë referuar pranë Prokurorisë për veprime të mëtejshme.
Radar.al