Situata e Bruce Willis po shqetëson fansat. Aktori, i cili në mars mbushi 70 vjeç dhe prej vitit 2022 jeton me një formë të avancuar të demencës frontotemporale, sipas mediave amerikane, përfshirë “Tribune”, tashmë nuk është në gjendje të flasë, lexojë apo të ecë.
Megjithatë, familja nuk ka dhënë ndonjë konfirmim zyrtar për përkeqësimin, përveç postimeve në rrjetet sociale që nënkuptojnë se ai nuk mund të flasë më. Në një postim të fundit në Instagram, shfaqet së bashku me vajzën me mbishkrimin: “Nuk i duhen fjalët, ajo ndjehet e sigurt dhe e dashur”, dhe një tjetër ku bashkëshortja Emma i puth fytyrën me përshkrimin: “Dashuria nuk ka nevojë për fjalë. Ndonjëherë një prekje thotë gjithçka”.
Në prill 2025, familja theksoi se edhe pse sëmundja po përparon, gjendja e tij është e qëndrueshme dhe ata vazhdojnë ta mbështesin me forcë në këtë periudhë të vështirë.
Demenca frontotemporale prek zonat e trurit të lidhura me sjelljen, personalitetin dhe të folurit, dhe është ndryshe nga Alzheimeri, duke prekur shpesh njerëz më të rinj. Rasti i Willis ka rritur ndërgjegjësimin për këtë sëmundje të rrallë dhe sfiduese.