Kryetari i pezulluar i Bashkisë së Tiranës, Erion Veliaj, ka bërë rekurs në Gjykatën e Lartë kundër vendimit të Apelit të Posaçëm, duke kërkuar ndryshimin e masës së sigurisë “arrest me burg”. Rekursi është dorëzuar nga avokatët përmes postës.
Veliaj ndodhet në burg që prej 10 shkurtit, nën akuzat për korrupsion dhe pastrim parash. Ai dhe bashkëshortja e tij, Ajola Xoxa, dyshohet se kanë ngritur një skemë të sofistikuar korruptive për të përvetësuar fonde publike nëpërmjet bashkëpunimit me kompani private dhe organizata joqeveritare që përfitonin kontrata nga Bashkia e Tiranës.