SARANDË– Një shtetas 35-vjeçar në Sarandë ka përfunduar në pranga pasi ka tentuar të korruptojë me ryshfet policinë rrugore.
Ai është arrestuar nga policia pasi gjatë kontrollit është gjetur pa leje drejtimi duke i dhënë makinës, e për këtë shkak për të mos u ndëshkuar për shkeljen e bërë shihet që i ka ofruar 50 Euro efektivit të policisë rrugore.
NJOFTIMI I PLOTË I POLICISË:
Sarandë
Drejtonte automjetin pa leje dhe tentoi të korruptojë policinë, arrestohet 35-vjeçari.
Specialistët për Hetimin e Krimeve në Komisariatin e Policisë Sarandë vunë në pranga K. H., 35 vjeç, lindur në Fier dhe banues në Greqi, pasi u kap në flagrancë duke drejtuar një automjet pa leje drejtimi dhe tentoi të korruptonte policinë.
Gjatë patrullimeve në lagjen nr. 2, në rrugën “Vangjel Pandi”, shërbimet e patrullës “Shqiponja” ndaluan për verifikim automjetin tip Seat, me drejtues shtetasin K. H.. Nga kontrollet, rezultoi se 35-vjeçari, drejtonte automjetin pa leje drejtimi dhe, për t’iu shmangur masave ligjore, tentoi të korruptonte punonjësit e policisë duke u ofruar 50 euro.
Policia e Sarandës vijon përkushtimin për të garantuar zbatimin e ligjit dhe sigurinë rrugore, duke goditur çdo tentativë për shkelje apo korrupsion.
Materialet procedurale u referuan në Prokurorinë pranë Gjykatës së Shkallës së Parë të Juridiksionit të Përgjithshëm Sarandë, për veprime të mëtejshme ligjore./Radar.al