Nga takimi i Bordit të Paqes në Uashington, kryeministri Edi Rama deklaroi se Shqipëria do të japë kontributin e saj me trupa ushtarake në Gaza, në kuadër të përpjekjeve ndërkombëtare për stabilizimin e situatës.
Gjatë fjalës së tij, Rama falënderoi Presidentin Trump për ftesën drejtuar Shqipërisë si një nga vendet anëtare të Bordit të Paqes, duke theksuar se vota e harmonizuar dypartiake në Parlamentin shqiptar dëshmon për rëndësinë e këtij angazhimi.
Kreu i qeverisë iu referua gjithashtu diskutimeve në Europë, ku – sipas tij – ka zëra që pretendojnë se Bordi i Paqes synon të zëvendësojë OKB-në. “Nuk më duket një përpjekje e tillë”, u shpreh Rama, duke shtuar: “Zoti e bekoftë Bordin e Paqes”.
Ai përgëzoi rolin e Presidentit në përpjekjet për t’i dhënë fund konfliktit në Gaza dhe konfirmoi angazhimin e Shqipërisë me trupa në terren. Po ashtu, Rama propozoi që bordi të zgjerojë bashkëpunimin me vende të tjera për të ndihmuar fëmijët dhe pengjet, si dhe për të kontribuar jo vetëm financiarisht, por edhe përmes ekspertizës profesionale, me synimin që zona të transformohet në një hapësirë shprese dhe zhvillimi për brezat e ardhshëm të Palestinës.