Një zjarr i madh ka përfshirë pasditen e sotme një sipërfaqe të konsiderueshme me toka djerrë dhe shkurre në zonën e njohur si “Pushimi i Shoferit” në Lushnjë. Erërat e forta kanë favorizuar përhapjen e flakëve, të cilat kanë përfshirë edhe një parcelë me ullinj, me një sipërfaqe prej rreth 4 dynymësh.
Në terren ndodhen dy mjete zjarrfikëse nga Shërbimi Zjarrfikës i Lushnjës, ndërkohë që edhe banorët e zonës janë angazhuar në përpjekjet për të shuar zjarrin, duke përdorur pompa dhe mjete rrethanore për të mbushur zjarrfikëset dhe për të hedhur ujë mbi flakët.
Zjarri ka avancuar në drejtim të banesave në fshatin Krutje e Poshtme, të cilat ndodhen shumë pranë vatrës kryesore. Autoritetet po bëjnë gjithçka të mundur për të frenuar përhapjen e mëtejshme të flakëve dhe për të mbrojtur banesat dhe pronat e qytetarëve.
