Familjarët e Flamur Kolmarkut kanë ngritur alarmin për zhdukjen e tij, pasi kanë humbur kontaktet me 55-vjeçarin që prej ditës së djeshme.
Sipas të afërmve, ai vuan nga demenca dhe ka probleme të theksuara me kujtesën, çka e bën të vështirë orientimin e tij dhe mund ta ekspozojë ndaj rreziqeve.
Mjekët që e kanë ndjekur kanë sugjeruar se, në situata të tilla, ai mund të tentojë të shkojë drejt vendeve ku ka jetuar më parë ose që lidhen me kujtimet e fëmijërisë. Për këtë arsye, familjarët dyshojnë se ai mund të jetë drejtuar në zonat e Mamurras, Rubik ose Rrëshen. Ndërkohë, informacionet e fundit tregojnë se ai është parë në Bulqizë, në drejtim të Burrel.
Të shqetësuar për fatin e tij, familjarët u bëjnë thirrje qytetarëve që mund ta kenë parë ose që disponojnë informacion mbi vendndodhjen e tij, të njoftojnë menjëherë familjen ose autoritetet përkatëse.
Ata kërkojnë gjithashtu që njoftimi të shpërndahet sa më gjerësisht, me shpresën se 55-vjeçari do të gjendet shëndoshë e mirë dhe do të rikthehet pranë të afërmve të tij.