UKRAINË– Volodymyr Zelensky, presidenti ukrainas ka deklaruar ditën e sotme se Rusia po përgatitet për sulme të reja vetëm disa ditë para takimit të planifikuar midis Presidentit të SHBA-së Donald Trump dhe homologut të tij rus Vladimir Putin.
“Ne shohim që ushtria ruse nuk po përgatitet t’i japë fund luftës. Përkundrazi, ata po bëjnë lëvizje që tregojnë përgatitje për sulme të reja. Në këto kushte, është e rëndësishme të mos kërcënohet uniteti i botës.”-shkroi Zelensky në rrjetet sociale.
Ndërkohë trupat ruse kanë përparuar me shpejtësi në një sektor strategjik të frontit në Ukrainën lindore, thanë sot zyrtarë dhe analistë ushtarakë ukrainas, disa ditë para bisedimeve të shumëpritura midis Shteteve të Bashkuara dhe Rusisë. Përparimi u zhvillua në verilindje të Pokrovskut, një qytet minierash dhe epiqendra e luftimeve në Donetsk, rajoni lindor i Ukrainës që Moska pretendon se e ka aneksuar.
Shtabi i përgjithshëm i forcave të armatosura ukrainase, duke pranuar de facto përparimin rus në këtë zonë, njoftoi sot se luftimet kishin shpërthyer në Kucheriv Yar, një fshat i vogël që disa javë më parë ishte vetëm disa kilometra larg frontit./Radar.al