Identiteti dixhital i autorit të dyshuar të sulmit është “breach3d”, një haker që pretendohet se ka nxjerrë në shitje 12–18 milionë rreshta të dhënash të vjedhura në forume të errëta online.
Sipas ligjit francez, aksesimi dhe vjedhja e paligjshme e të dhënave shtetërore dënohet me deri në 7 vite burg dhe gjobë që mund të arrijë në 300 mijë euro.
Agence Nationale des Titres Sécurisés (ANTS), institucioni që menaxhon të dhënat personale dhe dokumentet zyrtare të qytetarëve francezë, konfirmoi se informacionet e publikuara janë autentike. Agjencia bëri të ditur se kishte zbuluar “aktivitet të pazakontë” në sistem më 13 prill dhe e kishte referuar menjëherë rastin tek autoritetet.
ANTS është përgjegjëse për lëshimin e dokumenteve si kartat e identitetit, pasaportat, patentat e drejtimit dhe targat e automjeteve, si edhe për sistemet e verifikimit të moshës në internet.
Më 22 prill, agjencia njoftoi miliona qytetarë përmes email-it, duke i paralajmëruar për rrezikun e mashtrimeve të mundshme, si telefonata apo mesazhe të dyshimta, dhe duke i këshilluar të mos ndajnë të dhëna personale me persona të panjohur.
Megjithëse autoritetet deklaruan se janë marrë masa për përballimin e situatës, nuk u dhanë detaje konkrete mbi to.
Ky incident ka hapur një debat të gjerë në Francë mbi sigurinë e ruajtjes së të dhënave në sisteme të centralizuara, duke ngritur pikëpyetje serioze për mbrojtjen e privatësisë së qytetarëve në epokën digjitale.