Kai Trump, mbesa 18-vjeçare e Donald Trump, ka folur hapur për paragjykimet dhe komentet negative që thotë se përballet për shkak të mbiemrit të saj.
E ftuar në podcastin Impaulsive të Logan Paul, ajo u shpreh se “gjysma e botës” nuk e pëlqen, edhe pse shumë prej tyre nuk e njohin personalisht.
Kai, vajza e Donald Trump Jr. dhe Vanessa Trump, tregoi se shpesh përballet me komente të drejtpërdrejta, duke kujtuar një rast kur një person i panjohur i tha se gjyshi i saj është “i tmerrshëm”.
Ajo theksoi se dëshiron që njerëzit ta njohin si individ dhe të mos e gjykojnë vetëm nga familja, ndërsa shtoi se politika nuk është në planet e saj për të ardhmen. Sipas saj, kjo fushë është “shumë e rrezikshme” dhe nuk do të kandidonte kurrë për presidente.
Deklaratat e saj kanë nxitur reagime të ndryshme në rrjetet sociale: disa e mbështesin duke thënë se nuk duhet të paragjykohet për shkak të familjes, ndërsa të tjerë argumentojnë se mbiemri i saj i ka sjellë edhe privilegje.
Në fund, ajo u shpreh se e konsideron veten të moderuar dhe beson se njerëzit do të ishin më të lumtur nëse do të kishte më shumë mirëkuptim mes palëve politike.