Belgjika ka regjistruar shkallën më të lartë të vdekshmërisë së tepërt në Evropë gjatë valës së të nxehtit në fund të muajit qershor, raportoi e përditshmja belge Het Nieuwsblad, duke iu referuar të dhënave të rrjetit evropian për monitorimin e vdekshmërisë, EuroMOMO.
Sipas të dhënave të publikuara nga instituti belg i shëndetit publik Sciensano, gjatë kësaj periudhe u regjistruan mbi 2.000 vdekje më shumë se sa pritej bazuar në nivelet normale të vdekshmërisë.
Belgjika shënoi një shkallë të vdekshmërisë së tepërt prej 48%, dukshëm më të lartë se Franca, me 23%, dhe Holanda, me 13%, megjithëse të tre vendet u përballën me temperatura të ngjashme.
Ekspertët vlerësojnë se përveç temperaturave ekstreme, një rol të rëndësishëm kanë luajtur edhe faktorët socio-ekonomikë.
“Ekziston një dallim i konsiderueshëm mes Flandrës dhe Valonisë dhe një aspekt i pamohueshëm socio-ekonomik në këtë situatë”, deklaroi biostatisticieni Geert Molenberghs nga KU Leuven dhe Universiteti Hasselt.
Ai theksoi se kushtet e banimit ndikojnë drejtpërdrejt në ekspozimin ndaj të nxehtit.
“Në një shtëpi të madhe dhe të pavarur me më shumë hapësira të gjelbra përreth është më freskët sesa në një apartament të vogël ku jetojnë shumë njerëz”, u shpreh Molenberghs.
Sipas raportit, vetëm rajoni i Flandrës regjistroi një vdekshmëri të tepërt prej 31%, ende më e lartë se nivelet kombëtare të raportuara në Francë dhe Holandë.
Eksperti shtoi se mënyra e zhvillimit urban në Belgjikë mund të ketë përkeqësuar pasojat e valës së të nxehtit, duke argumentuar se ndërtimet e dendura dhe planifikimi urban jo i mirë kanë rritur ndikimin e temperaturave ekstreme mbi popullsinë.