Një laborator droge u zbulua nga Karabinierët në një apartament në Giussano, në provincën e Monzës, ku u sekuestruan 15 kilogramë kokainë, si dhe pajisje e materiale të përdorura për përpunimin dhe paketimin e lëndës narkotike.
Gjatë operacionit u arrestuan dy shtetas shqiptarë, të dy rreth 30 vjeç. Sipas autoriteteve italiane, karabinierët ndaluan fillimisht njërin prej tyre teksa po dilte nga ndërtesa. Me çelësat që ai mbante me vete, efektivët hynë në apartament, ku gjetën shqiptarin tjetër duke fjetur.
Brenda banesës u sekuestrua sasia e madhe e kokainës, së bashku me pajisjet e përdorura për përgatitjen dhe paketimin e dozave.
Sipas medias italiane Il Giorno, të dy të arrestuarit u paraqitën para gjyqtarit hetues të Gjykatës së Monzës. Njëri zgjodhi të mos jepte deklarime, ndërsa tjetri pretendoi se ndodhej rastësisht në Giussano.
Gjykata konfirmoi arrestimin e tyre dhe vendosi masën e sigurisë “arrest me burg”, ndërsa hetimet vijojnë.
#Itali #Shqiptarë #Kokainë #LaboratorDroge #Arrestim #Karabinierët #Monza #Giussano #Kronikë #Lajme #Droga #Krimi #Sekuestrim #Aktualitet