Një atentat mafioz tronditi Greqinë këtë të enjte, kur Georgios Moschouris, i njohur me nofkën “Thamnaki” dhe konsideruar si një nga liderët e mafies greke, u ekzekutua në zonën e Halkandrit, në Athinë.
Moschouris sapo kishte dalë nga një klinikë private kur persona të paidentifikuar, që udhëtonin me makinë, e qëlluan me breshëri kallashnikovi, duke e lënë të vdekur në vend. Viktima u godit disa herë, përfshirë në fytyrë.
Në vendngjarje u gjetën dhjetëra gëzhoja, ndërsa disa minuta më vonë, autoritetet gjetën një makinë të djegur në zonën e Patimës – e dyshuar si automjeti që përdorën autorët për t’u larguar pas krimit.
Moschouris i kishte shpëtuar një atentati në vitin 2020 në zonën e Voulës, por këtë herë nuk arriti t’u shpëtonte plumbave.
Policia ka rrethuar zonën dhe po punon për identifikimin e autorëve, duke analizuar pamjet nga kamerat e sigurisë dhe dëshmitë e banorëve.