Një delegacion i partisë Fratelli d’Italia mbërriti këtë të hënë në Shqipëri për të verifikuar nga afër funksionimin e Qendrës së Qëndrimit për Riatdhesime në Gjadër.
Përfaqësuesit e delegacionit mbërritën në Gjadër rreth orës 13:30 dhe qëndruan për afro tre orë brenda kampit, ku zhvilluan inspektime dhe morën informacion mbi situatën aktuale.
Pas përfundimit të vizitës, Sara Kelany, përgjegjëse e partisë për Departamentin e Emigracionit, dha një deklaratë të shkurtër për mediat, duke theksuar se qendra është funksionale dhe po operon pothuajse në kapacitet maksimal.
“Ne erdhëm këtu për të dëshmuar. Po, qendrat po funksionojnë në kapacitetin e tyre të CPR-së dhe aktualisht janë pothuajse në kapacitet të plotë. Deri më sot kanë kaluar rreth 536 persona; disa janë riatdhesuar, ndërsa të tjerëve u është anuluar ndalimi. Ne erdhëm këtu pikërisht për të dëshmuar funksionimin efektiv të CPR-së në Shqipëri”, deklaroi ajo.