Protestat kundër operacioneve të Zbatimit të Imigracionit dhe Doganave (ICE) janë përhapur në disa shtete të SHBA-së, ndërsa autoritetet e Minesotës kanë kundërshtuar hapur administratën federale pas vrasjes së dy qytetarëve amerikanë nga agjentë federalë.
Të premten, në kuadër të një greve mbarëkombëtare, restorante dhe biznese në disa qytete mbajtën qepenat mbyllur, ndërsa u shënuan mungesa në shkolla. Organizatorët bënë thirrje për bojkot të punës, shkollës dhe blerjeve, duke nxitur marshime dhe tubime proteste nga Kalifornia deri në Maine.
Në Minesota, protestat hynë në javën e dytë radhazi pas njoftimit të Departamentit të Drejtësisë për hapjen e një hetimi mbi të drejtat civile lidhur me vrasjen e Alex Pretti, i qëlluar për vdekje nga agjentë federalë. Pretti është viktima e dytë këtë vit në shtet, pas vrasjes së Renee Good në janar, çka ka rritur ndjeshëm presionin politik ndaj Shtëpisë së Bardhë.
Guvernatori i Minesotës, Tim Walz, reagoi duke theksuar se banorët e shtetit nuk kanë parë ende ndryshime konkrete nga administrata federale. Shtëpia e Bardhë ka lënë të hapur mundësinë e tërheqjes së disa agjentëve nga Minneapolis.
Tubime solidariteti u zhvilluan edhe në qytete të tjera, përfshirë Baltimore-in, ku protestuesit kundërshtuan veprimet e ICE-së dhe përplasjet fatale ku janë përfshirë agjentë federalë.
Zëvendës Prokurori i Përgjithshëm i SHBA-së, Todd Blanche, konfirmoi se hetimi për vrasjen e Prettit po drejtohet nga FBI-ja dhe do të shqyrtojë nëse gjatë ndërhyrjes janë shkelur ligjet federale, duke e cilësuar procesin si një “hetim standard”.
Ndërkohë, tensionet u rritën pas arrestimit të ish-prezantuesit të CNN, Don Lemon, dhe gazetares së pavarur Georgia Fort, gjatë mbulimit të një proteste në St. Paul. Arrestimet kanë ngjallur reagime të forta nga organizatat për mbrojtjen e lirisë së shtypit.
Në zhvillime të tjera, aktivistë për të drejtat e emigrantëve kanë ngritur padi në Boston kundër një politike të ICE-së për hyrjen në banesa pa urdhër gjyqësor, ndërsa në Nju Jork guvernatorja Kathy Hochul ka propozuar ligj për të kufizuar bashkëpunimin e policisë lokale me ICE-n.