Pren Shota, babai i Roger Shotës – autorit të dyshuar të vrasjes së Vladimir Topjanit – do të vijojë masën e sigurisë në arrest shtëpie. Vendimi u dha nga Gjykata e Apelit italiane, duke ndryshuar masën e paraburgimit për 65-vjeçarin shqiptar, i cili ndodhej në burg prej 6 prillit.
Vrasja ndodhi jashtë lokalit “Bar Sporting Milan Club” në Fontanafredda, pas një debati që nisi në një tjetër bar në Sacile dhe dyshohet të jetë i lidhur me konflikte të vjetra në Shqipëri. Në kulmin e përplasjes, kur Pren Shota ishte i shtrirë në tokë dhe u sulmua fizikisht nga Vladimir Topjani, djali i tij, Roger Shota, nxori një armë dhe qëlloi dy herë, duke e lënë viktimën të vdekur.
Pren Shota u arrestua fillimisht për bashkëpunim në vrasje, me dyshimin se kishte dijeni për armën. Por në deklaratat e tij para prokurorisë dhe gjykatës, ai këmbënguli se nuk e kishte ditur as për armën dhe as për qëllimin e të birit për të qëlluar. Kjo dëshmi u mor parasysh nga Gjykata e Rishikuar, që vendosi masën më të butë – arrest shtëpie me monitorim elektronik.
Hetimet vijojnë, ndërsa Roger Shota mbetet në paraburgim, përballë akuzës për vrasje me dashje.