Mark Samson dyshohet se ka kryer një vrasje brutale ndaj studentes shqiptare Ilaria Sula, duke e goditur disa herë me thikë në banesën e saj në via Homs 8, në lagjen afrikane të Romës. Sipas raportit të ekspertizës mjeko-ligjore, vrasja dyshohet të ketë ndodhur në mbrëmjen e 25 marsit dhe jo mëngjesin e 26 marsit, siç kishte deklaruar fillimisht vetë autori i dyshuar.
Gjurmë të shumta gjaku janë identifikuar në korridoret e banesës, në mure, në zonën e dushit, si dhe në lavamanët e tualetit dhe kuzhinës. Hetuesit kanë konstatuar se sasia e gjakut tregon një përpjekje për pastrim, por që nuk e ka fshirë plotësisht skenën e krimit.
Gjurmë janë zbuluar edhe në furçat e përdorura për pastrimin e dyshemesë, në dorezat e shtëpisë dhe madje edhe në dorezën e makinës së Samsonit. Të dhënat e hetimit tregojnë se ai kishte blerë produkte pastrimi në një dyqan pranë shtëpisë më 26 mars – fakt që është konfirmuar edhe nga një faturë e regjistruar.
Trupi i pajetë i 22-vjeçares u gjet më 2 prill, në një shpat mali në zonën Guadagnolo, në komunën Capranica Prenestina, ku dyshohet se është hedhur pas krimit.
Hetuesit nuk përjashtojnë mundësinë që persona të tjerë të kenë ndërhyrë në përpjekje për të fshirë gjurmët, një element që po hetohet intensivisht ndërsa çështja merr përmasa gjithnjë e më serioze.