Drejtori i Policisë së Shtetit, Skënder Hita, dhe ministri i Brendshëm, Besfort Lamallari, dolën në një konferencë për shtyp lidhur me ngjarjen e rëndë të ndodhur në Maliq, ku një efektiv i forcës “Shqiponja” humbi jetën dhe një tjetër mbeti i plagosur gjatë një operacioni për kapjen e një personi në kërkim.
Në fjalën e tij, Hita shprehu ngushëllimet për familjen e efektivit të rënë në krye të detyrës, Enea Mekolli, dhe dha detaje mbi rrethanat e operacionit.
“Një punonjës policie i dalluar dhe shembullor ndërroi jetë, ndërsa një tjetër mbeti i plagosur gjatë kryerjes së detyrës. Jam këtu për të ndarë dhimbjen me familjarët e Enea Mekollit, i cili humbi jetën gjatë këtij operacioni”, deklaroi ai.
Sipas kreut të Policisë së Shtetit, në orën 07:30 të mëngjesit forcat policore mbërritën në vendin ku strehohej personi i kërkuar. Ai sqaroi se bëhej fjalë për një shtetas të dënuar me 9 vite burg nga Gjykata e Korçës, ndërsa që prej vitit 2011 ndaj tij ishte vendosur masa e sigurisë “arrest me burg” për kultivim të lëndëve narkotike.
Hita bëri të ditur se gjatë operacionit personi në kërkim ka sulmuar forcat e policisë me armë zjarri, duke detyruar efektivët të kundërpërgjigjen. “Për të neutralizuar sulmin e të kërkuarit, punonjësit e policisë shkëmbyen zjarr me të, ndërsa gjatë përplasjes mbeti i plagosur edhe vetë i kërkuari”, tha ai.
Drejtori i Policisë shtoi se ndaj këtij personi ishin organizuar edhe më herët operacione të tjera për arrestimin e tij, por pa rezultat.
“Kam urdhëruar Drejtorinë e Përgjithshme të Policisë për të nisur një hetim mbi punën e bërë për kapjen e këtij personi. Ndërkohë, grupi hetimor po vijon veprimet për dokumentimin e plotë ligjor të ngjarjes”, u shpreh Hita.
Ai përcolli ngushëllimet për familjen e efektivit të vrarë dhe i uroi shërim të shpejtë policit të plagosur.
“Personat që sulmojnë punonjësit e Policisë së Shtetit do të përballen me ndëshkimin maksimal që parashikon ligji. Gjaku i Enea Mekollit nuk do të harrohet kurrë”, deklaroi ai.
Duke iu përgjigjur pyetjeve të gazetarëve, Hita theksoi se nuk kishte dijeni paraprake për zhvillimin e operacionit, pasi ai ishte organizuar dhe drejtuar nga Policia e Korçës.
“Punonjësit e policisë janë të gjithë të trajnuar dhe në këtë rast janë angazhuar strukturat më të specializuara, si forcat ‘Shqiponja’. Në vlerësimin e drejtuesve të Drejtorisë Vendore të Policisë Korçë, këto ishin strukturat e duhura për realizimin e operacionit”, tha ai.
Sipas tij, në aksion morën pjesë 40 efektivë policie. “Të gjithë ishin të pajisur me jelekë antiplumb, por arma kallashnikov e përdorur nga autori arriti të depërtonte mbrojtjen balistike. Patjetër që duhet bërë më e mira edhe në këtë drejtim”, përfundoi Hita.