Presidentja e Komisionit Evropian, Ursula von der Leyen, ka mbijetuar sot mocionit të mosbesimit të paraqitur në Parlamentin Evropian nga grupi i djathtë ekstrem “Patriots for Europe” (PfE), duke ruajtur kështu postin e saj në krye të Komisionit, raportojnë mediat ndërkombëtare, mes tyre Euronews.
Rezultati i votimit ishte i qartë: 390 eurodeputetë votuan kundër rrëzimit të Komisionit, 165 në favor të mocionit dhe 10 abstenuan. Për miratimin e mocionit kërkohej një shumicë prej dy të tretash të votave, prag që nuk u arrit.
Mocioni i mosbesimit u përqendrua kryesisht te marrëveshja tregtare BE–Mercosur, me iniciatorët që akuzuan Komisionin se kishte anashkaluar shqetësimet e fermerëve dhe qytetarëve evropianë dhe se kishte tejkaluar kompetencat e veta.
Gjatë javës, shoqata të fermerëve organizuan protesta jashtë Parlamentit Evropian në Strasburg, ndërsa debati për mocionin u zhvillua të hënën, me Komisionerin për Tregtinë dhe Marrëdhëniet Ndërinstitucionale, Maros Sefcovic, që përfaqësoi Komisionin Evropian.
Pavarësisht kritikave ndaj marrëveshjes Mercosur, shumica e grupeve kryesore politike – përfshirë Partinë Popullore Evropiane (EPP), Socialistët dhe Demokratët (S&D), Renew Europe dhe Gjelbërit – shprehën mbështetje për Von der Leyen, duke e bërë rezultatin e votimit të parashikueshëm.
Gjatë mandatit të saj të dytë, Ursula von der Leyen i ka mbijetuar katër mocioneve të mosbesimit, ndërsa votimi i sotëm sinjalizon një rritje të mbështetjes parlamentare ndaj saj, pavarësisht debateve dhe kundërshtive që shoqërojnë politikat tregtare të BE-së.