TIRANË– Ditën e sotme nuk janë paraqitur 5 nga personat e thirrur për të dëshmuar në Komisionin hetimor të Sterilizimit.
Bëhet fjalë për tre shtetasit italianë, aksionerë në kompanitë e sterilizimit, për të tretën herë me radhë kanë refuzuar pjesëmarrjen në komision duke argumentuar se për shkak të angazhimeve të tyre personale dhe të punës, nuk munden të dëshmojnë.
Ndërkohë kryetarja e Komisionit Albana Vokshi ka deklaruar se këto persona kanë përfituar miliona jo vetëm si aksionerë, por edhe si konsulentë privatë apo me kompani nënkontraktuese. Gjithashtu i njëjti problem është hasur edhe me dy dëshmitarët shqiptarë, Artan Lleshi dhe Altin Fani.
Ndrër të tjera Vokshi u shpreh se Lleshi, refuzoi edhe dëshminë gjatë së premtes duke paraqitur një epikrizë, ndërsa për sot ka paraqitur një raport me fuqi prapavepruese me çudira në aspektin e afateve.
Demokratja deklaroi se dëshmia e Lleshit është konsideruar shumë e rëndësishme për komisionin, duke pasur parasysh se është mjek dhe drejtor në kompaninë koncesionare të sterilizimin. Ajo thotë se ai ka edhe kompani nënkontraktore, duke përfituar miliona nga paratë e shqiptarëve.
Në cilësinë e kryetares së Komisionit Albana Vokshi deklaroi se për të pestë personat, Umbro Staccini, Elisabetta Anzanello, Giorgio Tardioli, Artan Lleshi dhe Altin Fani do të veprohet në bazë të Kodit të Procedurës Penale dhe do t’i drejtohet policisë për të siguruar praninë e tyre në komision për të dëshmuar./Radar.al