Është nënshkruar Memorandumi për zhvillimin e hub-it energjetik të Vlorës, së bashku me një marrëveshje kuadër për furnizimin me gaz të lëngshëm natyror (LNG), duke shënuar një hap të rëndësishëm drejt diversifikimit të burimeve energjetike dhe rritjes së pavarësisë energjetike të vendit. Ky bashkëpunim realizohet në partneritet të ngushtë me Shtetet e Bashkuara dhe në koordinim me Greqinë.
Në ceremoninë e nënshkrimit morën pjesë Kryeministri Edi Rama, Ministri i Energjisë dhe Infrastrukturës, Enea Kakaraçi, ambasadorja e SHBA-së në Greqi, Kimberly Guilfoyle, si dhe e ngarkuara me punë e SHBA-së në Tiranë, Nancy VanHorn.
Siguria energjetike vijon të jetë në fokus të politikave qeveritare, me synimin për të garantuar stabilitet dhe qëndrueshmëri afatgjatë. Në këtë kuadër, forcimi i partneritetit strategjik me SHBA-në konsiderohet thelbësor për ndërtimin e një sistemi energjetik të besueshëm dhe të diversifikuar.
Projekti “Vlora Energy Hub” parashikon modernizimin e TEC-it ekzistues në Vlorë, ndërtimin e kapaciteteve të reja prodhuese, zhvillimin e infrastrukturës për LNG dhe integrimin me rrjetin kombëtar të gazit. Synimi kryesor është rritja e prodhimit vendas, fuqizimi i pavarësisë energjetike dhe pozicionimi i Shqipërisë si një nyje e rëndësishme energjetike në rajon. Një komponent kyç i projektit është sigurimi i furnizimit afatgjatë me LNG nga SHBA, duke nisur nga viti 2030.
Qeveria shqiptare synon që deri në vitin 2030, Shqipëria të shndërrohet në një eksportues neto të energjisë, duke e bërë këtë një nga objektivat strategjikë më të rëndësishëm.