Presidentja e Kosovës, Vjosa Osmani, i ka dhënë sot mandatin kandidatit të propozuar nga Lëvizja Vetëvendosje, Glauk Konjufca, për të formuar Qeverinë e re.
Osmani theksoi se Kushtetuta e Kosovës e detyron presidentin të emërojë mandatarin e dytë në rast se përpjekja e parë dështon:
“Kushtetuta nuk thotë ‘mund të emëroj’, por ‘emëron kandidatin tjetër’. Vendimi im është në përputhje me tri aktgjykime të Gjykatës Kushtetuese dhe neni 95.4 të Kushtetutës,” deklaroi Osmani.
Ndërkohë, kryeministri në detyrë Albin Kurti u shpreh se Glauk Konjufca disponon të gjitha votat që Kurti kishte marrë më 26 tetor në Kuvend, pra 56 vota, dhe nuk sheh mundësi për koalicion me partitë tjera.
“Konjufca i ka të gjitha votat që i kam pasur unë. Maksimumi im është minimumi i Glaukut, prandaj le të përpiqemi maksimalisht,” tha Kurti.
Me këtë hap, Konjufca nis procedurat për formimin e qeverisë së re të Kosovës, duke synuar stabilitet dhe përmbushjen e mandatit parlamentar të LVV-së.