Rezidenca luksoze Villa Certosa, e njohur si një nga pronat më prestigjioze në Itali dhe ish-shtëpia e ish-kryeministrit Silvio Berlusconi, është shitur për 350 milionë euro familjes mbretërore të Katar.
Sipas mediave italiane, marrëveshja është finalizuar nga Immobiliare Idra, e cila ka pranuar ofertën detyruese për shitjen e pronës. Negociatat për vilën kishin muaj që zhvilloheshin dhe tashmë kanë arritur në përfundim.
Pasuria do të kalojë në pronësi të dinastisë Al Thani, e cila vitet e fundit ka zgjeruar ndjeshëm investimet e saj në rajonin e Gallurës dhe në sektorë strategjikë si turizmi dhe shëndetësia.
Villa Certosa ishte vendosur në treg pas vdekjes së Berlusconit në vitin 2023. Në atë kohë u raportua për interes të madh nga investitorë ndërkombëtarë dhe grupe prestigjioze hotelerie, ndërsa vlera fillestare e kërkuar për pronën arrinte në 500 milionë euro.
E konsideruar si një nga rezidencat private më luksoze në Mesdhe, vila ka pritur ndër vite liderë botërorë, personalitete të politikës dhe biznesit ndërkombëtar. Kompleksi përfshin pishina, spa, ambiente sportive, vila për mysafirë, pistë helikopterësh, si dhe një vullkan artificial, element që e ka bërë pronën të famshme në mbarë botën.
