Vala e të nxehtit që ka përfshirë Evropën pritet të sjellë temperatura deri në 40 gradë Celsius edhe në ditët në vijim, duke rritur rrezikun për shëndetin e qytetarëve, veçanërisht për grupet më të ndjeshme.
Ekspertët e Instituti i Shëndetit Publik dhe autoritetet shëndetësore u bëjnë thirrje qytetarëve të tregojnë kujdes të shtuar gjatë kësaj periudhe, pasi temperaturat e larta dhe dehidratimi mund të shkaktojnë goditje nga nxehtësia dhe përkeqësim të sëmundjeve kronike.
Sipas ekspertes së ISHP-së, Rudina Cunashi, vëmendje e veçantë duhet t’u kushtohet foshnjave dhe fëmijëve të vegjël, të cilët nuk duhet të ekspozohen në diell gjatë orëve të pikut. Ajo rekomandon veshje të lehta, hidratim të vazhdueshëm dhe kujdes të shtuar me ushqyerjen e tyre.
Ekspertët paralajmërojnë gjithashtu për rrezikun e prishjes së ushqimeve në temperatura të larta, duke u kërkuar familjeve që të ruajnë dhe konsumojnë produktet ushqimore sipas kushteve të sigurisë, për të shmangur problemet gastrointestinale.
Ndërkohë, personat që vuajnë nga sëmundje kronike këshillohen të konsultohen me mjekun e tyre, pasi në disa raste mund të jetë e nevojshme përshtatja e dozave të medikamenteve në varësi të gjendjes shëndetësore.
Mjekët japin këshilla edhe për pushuesit në bregdet, duke theksuar se hyrja e menjëhershme në ujë pas ekspozimit të gjatë në diell mund të jetë e rrezikshme dhe të shkaktojë probleme serioze shëndetësore.
Autoritetet u bëjnë thirrje qytetarëve të shmangin daljet gjatë orëve më të nxehta të ditës, të konsumojnë sa më shumë lëngje dhe të qëndrojnë në ambiente të freskëta për të minimizuar efektet e valës së të nxehtit.