Para pak çastesh nisi numërimi i votave për kandidatët e ndodhur në listën e hapur.
Ajo që bie në sy menjëherë është fakti politikanët që kanë marrë më shumë vota nga PS deri në këto momente në qarkun e Tiranës është Blendi Gonxhja me 5080, i cili ndiqet nga Fatmir Xhafaj dhe Erion Braçe.
Ndërsa femra me më shumë vota deri tani në listën e hapur të PS në Tiranë është Anila Denaj.
Nga ana tjetër në listën e hapur të PD-ASHM në Qarkun e Tiranës më shumë vota ka marrë Ilir Alimehmeti 1115, i ndjekur nga Jorida Tabaku.
Kjo e fundit në një prononcim për Top Channel, Tabaku u shpreh se do t’i shkojë deri në fund procesit të numërimit të votave. Ndërsa u shfaq optimiste për sigurimin e një mandati.
“Pres që të paktën ato vota që janë për PD dhe për mua t’i shkojë deri në fund procesit, doja të falenderoj këta që po numërojnë, po kujdeset që çdo votë demokrati të numërohet. Jemi në degën nr. 5 të Tiranës në “Vasil Shanto”. Nuk e di çfarë kanë kutitë, duke i numëruar që ka vota për mua dhe të tjerët por e sigurt është që do t’i shkojmë procesit deri në fund. Do të vazhdojë numërimi… Nuk di të them, mendoj se është tek 14 numri i mandateve, jam e sigurt që duke u numëruar kutitë projeksioni do të ndryshoje, nuk dua të bëj parashikime. Këtu janë njerëz që po përkushtohen në mënyrë të jashtëzakonshme. Ne jemi akoma në proces numërimi, në proces të çdo kutie për të përfunduar. Do ta shohim trendin e kandidatëve nesër në mëngjes. Janë vetëm degët elektronike të Vorës dhe njësisë 10 që kanë përfunduar. Këto zgjedhje janë një mundësi e humbur në integrimin europian“, tha Jorida Tabaku.