Close Menu
    Youtube
    Botë

    VIDEO/ Përmbytje shkatërruese në Kili, të paktën 10 viktima dhe disa persona të zhdukur; shpallet gjendje e jashtëzakonshme

    Pamje të rënda të kaosit dhe shkatërrimit po qarkullojnë nga Kili, ku përmbytjet masive të shkaktuara nga reshjet intensive kanë lënë pas viktima dhe dëme të mëdha materiale.

    Sipas autoriteteve kiliane, të paktën 10 persona kanë humbur jetën, ndërsa katër të tjerë rezultojnë të zhdukur si pasojë e motit ekstrem.

    Për shkak të situatës së rënduar, është shpallur gjendje e jashtëzakonshme në rajonin e Coquimbo dhe provincën Huasco, ku reshjet e dendura kanë shkaktuar përmbytje të gjera dhe rrëshqitje dheu.

    Videot e publikuara në rrjetet sociale tregojnë një situatë dramatike, me lumenj që kanë dalë nga shtrati, diga të përmbytura dhe rrugë të bllokuara nga uji, mbeturinat dhe shkëmbinjtë e mëdhenj.

    Agjencia kombëtare e reagimit ndaj katastrofave në Kili (Senapred) bëri të ditur se mijëra qytetarë janë prekur nga kushtet ekstreme të motit, ndërsa më shumë se 99 mijë persona kanë mbetur të izoluar në zona të ndryshme të vendit.

    Në disa qytete, rrugët janë kthyer në kanale uji, ndërsa automjete dhe autobusë janë përfshirë nga përmbytjet.

    Autoritetet meteorologjike raportuan reshje historike në disa zona të Coquimbos. Në stacionin meteorologjik të Cerro Tololo janë regjistruar më shumë se 200 milimetra reshje shiu.

    Presidenti i Kilit, José Antonio Kast, deklaroi se qeveria ka aktivizuar “gjendjen e fatkeqësisë”, në përputhje me kushtetutën, për të përballuar pasojat e kësaj situate të jashtëzakonshme.

    Share.